Onlayn olimpiada boshlanmoqda!
O‘zbekiston Respublikasida koronavirus infektsiyasining tarqalishini oldini olish va taʼlim muassasalarida sanitariya-epidemiologik osoyishtalikni taʼminlash maqsadida umumiy o‘rta taʼlim muassasalari o‘quvchilari uchun 2020 yil 16 mart kunidan eʼtiboran qo‘shimcha taʼtil eʼlon qilindi. O‘zbekiston Respublikasi Prezidentining 2019 yil 3 maydagi “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari to‘gʼrisida” PQ-4306-son qarorida belgilangan vazifalarning ijrosini taʼminlash maqsadida, “Onlayn olimpiadalarni tashkil etish hamda iqtidorli o‘quvchilar zahirasini shakllantirish” axborot tizimi olympiad.uzedu.uz veb-sayti ishga tushirildi. 2020 yil 24 mart kunidan boshlab, umumtaʼlim maktablarining 4-11-sinflari hamda akademik litseylar va kasb-hunar kollejlari oʼquvchilari uchun 5 ta fandan - matematika, fizika, kimyo, biologiya, informatika va axborot texnologiyalari fanlaridan - respublikamizda ilk bora onlayn olimpiada tashkil etiladi. Onlayn olimpiadada o‘quvchilar ixtiyoriy ravishda, masofaviy tarzda ishtirok etishlari mumkin. Olimpiadada ishtirok etish mutlaqo bepul bo‘lib, buning uchun o‘quvchilar Xalq taʼlimi vazirligining olympiad.uzedu.uz vebsayti orqali onlayn ro‘yxatdan o‘tishlari va tahsil olayotgan taʼlim muassasalaridan masʼul xodimi tomonidan elektron tarzda tasdiqdan oʼtishlari lozim boʼladi. O‘quvchilar olimpiada o‘tkaziladigan muddatdan kamida bir kun oldin ro‘yxatdan o‘tishlari so‘raladi. Onlayn olimpiada topshiriqlari murakkablik darajasi turlicha bo‘lgan 20 ta test savollaridan iborat bo‘lib, ularni bajarish uchun har bir o‘quvchiga 60 daqiqa vaqt ajratiladi. Аjratilgan vaqt yakuniga yetgach, o‘quvchilar o‘z reytinglarini koʼrishlari hamda olimpiadada ishtirok etganligilari to‘gʼrisidagi sertifikatlarini elektron tizimdan yuklab olishlari mumkin. Аziz o‘quvchilar, onlayn olimpiada o‘z bilimlaringizni sinash uchun qulay imkoniyatdir. Xalq taʼlimi vazirligi Fan olimpiadalari bo‘yicha iqtidorli o‘quvchilar bilan ishlash Departamenti onlayn olimpiada ishtirokchilariga omad tilaydi! Telegram kanalga ulanish https://t.me/olimpdep 
