2020 yilning 7-15 dekabr kunlari Xalqaro taqsimlangan fizika olimpiadasi (International distributed physics olympiad, IdPhO) masofaviy tarzda bo‘lib o‘tdi.

Jahonning 57 ta mamlakatidan 285 nafar o‘quvchi ishtirok etgan mazkur olimpiadada IPhO-2020 uchun saralangan milliy terma jamoa aʼzolari ishtirok etdilar. Mazkur olimpiadada O‘zbekiston sharafini besh nafar iqtidorli o‘quvchi ximoya qildi:

• Rail Xashayev - Toshkent shahri 71-maktab 11-sinf o‘quvchisi;
• Madinabonu Xasanova – S.X.Sirojiddinov nomidagi akademik litsey 1-bosqich o‘quvchisi;
• Mironshox Yusufov – Toshkent shahridagi Turin politexnika universiteti 1-bosqich talabasi;
• Sardor Boboshev - Toshkent shahridagi INHА universiteti 1-bosqich talabasi;
• Аzizbek Tursunov – Moskva fizika va texnologiya instituti 1-bosqich talabasi.

Mamlakatimiz jamoa aʼzolaridan Rail Xashayev bronza medalini qo‘lga kiritdi. Sardor Boboshev va Аzizbeklar Tursunov esa faxrli diplom bilan taqdirlandilar. Olimpiadaning nazariy bosqichida o‘quvchilarga 3 ta savol berilib, 5 soat vaqt ajratildi, amaliy qismida esa, ishtirokchilar tashkiliy qo‘mita tomonidan jo‘natilgan laboratoriya jihozlarida tajriba o‘tkazdilar. 

Ushbu xalqaro olimpiada karantin qoidalariga rioya qilingan holda, Toshkent shahridagi Prezident maktabida xalqaro hakamlar video-kuzatuvi ostida o‘tkazildi. Toshkent shahridagi Turin politexnika universiteti o‘qituvchisi Doniyor Bobojonov terma jamoa rahbari sifatida o‘quvchilar bilan o‘quv mashg‘ulotlarini tashkil qilib, ularni mazkur xalqaro olimpiadaga tayyorladi.