Buxoro viloyati Peshku tumanidagi 18-maktab oʼquvchisi Jahongir Norboev ilk bor oʼtkazilgan Kibermatematika musobaqasida bronza medalni qoʼlga kiritdi.
Cyberspace Mathematics Competition musobaqasi Аmerika matematika musobaqalari hamda AOPS tashkiloti bilan hamkorlikda oʼtkazildi.
13 iyul kuni masofaviy tarzda start olgan ushbu musobaqada dunyoning 75 ta davlatidan jami 555 nafar ishtirokchi qatnashdi.
Musobaqada har bir davlatdan 8 nafargacha ishtirokchilar qatnashishi mumkin edi va bunda albatta har bir jamoada 2 qiz boʼlishi kerak degan talab qoʼyildi, ular Bibisora Roʼzimboeva ( Qorakoʼl tumani) va Iroda Narzieva (Navoiy viloyati) boʼldi.
Musobaqa shartlariga koʼra, 5 soat ichida 4 tadan masalani yechish lozim edi. Oʼzbekiston terma jamoasining eng yaxshi qatnashchisi Jahongir Norboev birinchi kuni 3 ta toʼliq, ikkinchi kuni esa 2 ta masalani yechishga muvaffaq boʼldi va АQSh, Rossiya, Xitoy, Janubiy Koreya, Tayland, Singapur, Germaniya kabi xalqaro olimpiadada ilgʼor hisoblangan davlatlar ishtirokchilari orasida yaxshi natija koʼrsatdi. Musobaqa ishtirokchilari Diyorbek Tolibov (Buxoro viloyati 5-IDUM) hamda Farruh Mahmudovlar (Samarqand viloyati OʼzMU S.X.Sirojiddinov nomidagi АL) “Maqtov yorligʼi” bilan taqdirlandi.
Fan olimpiadalari boʼyicha iqtidorli oʼquvchilar bilan ishlash departamenti va matematika fani boʼyicha Oʼzbekiston terma jamoasi rahbari Matematika instituti katta ilmiy xodimi phd.Rustam Turdibaev bilan hamkorlikda Аmerikaning Matematika Аssosiatsiyasi tomonidan oʼtkazilgan masofaviy onlayn olimpiadada Oʼzbekiston terma jamoasining ishtiroki taʼminlandi.
Jahongir uchun bu ilk xalqaro gʼalaba emas
Jahongir Norboev 2003 yil 12 may kuni Buxoro viloyatida oʼqituvchi oilasida tugʼilgan. Jahongir 2016 yilning avgust oyida Tayland Qirolligining Changmey shahrida boʼlib oʼtadigan Xalqaro Matematika Musobaqasi(IMC)da qatnashib Respublikamiz sharafini munosib himoya qilgan, 2017 yil yanvar oyida Yaponiya davlatining “SАKURА” ilmiy taqiqot dasturi bo'yicha Yaponiya davlatiga oʼqib sertifikat bilan taqdirlangan. 
2018 yil Lomonosov nomidagi Moskva Davlat Universiteti tashkil etgan olimpiadada katnashib faxriy yorliq bilan taqdirlangan. 2018 yilning iyul oyida Bolgariya davlatining Burgas shahrida boʼlib oʼtgan Xalqaro Matematika Musobaqasi (IMC) da kumush medalni qoʼlga kiritgan.
2019 yil “Uchinchi ming yillik/Hamjihatlik formulasi” nomidagi xalqaro matematika olimpiadasida 3-oʼrinni qoʼlga kiritdi. 2019 yilning 1-6 avgust kunlari Janubiy Аfrika Respublikasining Durban shaxrida bo'lib oʼtgan xalqaro matematika olimpiadasiga qatnashish yoʼllanmasini qoʼlga kiritib, xalqaro matematika musobaqasi(IMC)da kumush medal bilan taqdirlangan. Italiyaning Piza Universteti va Xalq Taʼlimi Vazirligi bilan hamkorlikda tashkil etilgan Respublika olimpiadasida 3-oʼrinni egallagan. 
2020 yilda Moskva fizika-texnika instituti tashkil etgan olimpiadada qatnashib 2-oʼrinni egallagan va talabalikka taklif qilingan. Bundan tashqari Rossiya milliy yadroviy tadqiqot instituti “NIYaU MIFI” tomonidan tashkil etilgan Rosatom nomli xalqaro fizika-matematika olimpiadasiga 1-oʼrinni egallagan va muddatidan oldin talabalikka qabul qilingan. 8-14 yanvar kunlari Qozogʼistonning Olma-ota shahrida boʼlib oʼtgan Jautikov olimpiadasida Oʼzbekiston terma jamoasining aʼzosi sifatida qatnashib kumush medalni qoʼlga kiritgan.